СПОРТ

СПОРТ

Швајцарецот Дидие Куш на 34-годишна возраст го освои првиот златен медал во кариерата, откако вчера победи на машката суперџи-трка на Светското првенство во францускиот ски-центар Вал Дизер. Куш сезонава немаше ниту една победа на трките од Светскиот куп, а вчера ја лизна конкуренцијата. Тој патеката во Вал Дизер ја мина за 1 минута, 19 секунди и 41 стотинка што му донесе триумф и титула светски првак во дисциплината која е микс на спуст и велеслалом. Сребрениот медал се најде на градите на Петер Фил од Италија, кој заостана 99 стотинки, додека бронзата му припадна на Норвежанецот Аксел Лунд Свиндал, кој имаше 1 секунда и две стотинки послабо време од Куш, кој стартуваше како 16-ти.

Најголем успех досега на Куш му беше второто место во суперџи на Зимските олимписки игри во Нагано 1998, а има и бронза во велеслалом од СП во Оре пред две години. Швајцарецот две години по ред беше најдобар спусташ во Светскиот куп. Дидие Дефаго, кој победи на спустовите во Венген и Кицбил, вчера во суперџи беше само осми и не успеа да го потврди своето место како најбрз швајцарски скијач. Светскиот првак од претходното СП, Патрик Штаудахер од Италија, вчера заостана дури 2 секунди и 61 стотинка. Потфрли и Херман Маер, кој годинава е лидер во суперџи, но во Вал Дизер имаше речиси три секунди послабо време од Куш.

Денес мажите и жените ќе тренираат спуст. Утре жените се борат за медали во супер-комбинација.